प्रदेश ३ को स्थायी राजधानी र नाम तत्काल तोक्न कांग्रेसको माग
हेटौंडा । नेपाली कांग्रेस प्रदेश ३ को संसदीय दलको आइतबार बसेको बैठकले स्थायी राजधानी र नाम छिटो टुंगाउन माग गरेको छ । कांग्रेस प्रदेश ३ का संसदीय दलका नेता इन्द्रबहादुर बानियाँको अध्यक्षतामा भएको बैठकले स्थायी राजधानी र नामको टुंगो तत्काल लगाउन प्रदेश ३ सरकारको ध्यानाकर्षण गराएको हो ।
लामो समयदेखि प्रदेशसभाको बैठक सञ्चालन नहुँदा जनताका समस्या र प्रदेशका कानून निर्माणमा समेत असर परिरहेको अवस्थामा तत्काल हिउँदे अधिवेशन बोलाउन कांग्रेसले माग गरेको छ । प्रदेशसभालाई सरकारले अनिर्णय बन्दी बनाएको आरोप कांग्रेसले लगाएउँदै सरकारको काम कारबाही सन्तोषजनक नभएको भन्दै आलोचना गरेको छ ।
काठमाडौंमा भएको बैठकले हालै भएको उपनिर्वाचनबाट ३ नम्बर प्रदेशसभा सदस्यमा भक्तपुरक्षेत्र नम्बर १ को क बाट निर्वाचित कृष्णलाल भडेल लाई स्वागत तथा सम्मान गरेको छ । बैठकमा प्रदेश ३ का सांसदको सहभागिता रहेको थियो ।