वाग्मती लोकसेवा आयोगका सदस्य ढकालद्वारा राजीनामा
बाइलाइन नेपाल
वाग्मती प्रदेश लोकसेवा आयोगका सदस्य सुदर्शनप्रसाद ढकालले असन्तुष्टि जनाउँदै पदबाट राजीनामा दिएका छन् । प्रदेश सरकारले आफूभन्दा कनिष्ठलाई वाग्मती प्रदेश लोकसेवा आयोगको अध्यक्ष नियुक्त गरेको भन्दै असन्तुष्टि जनाउँदै ढकालले प्रदेश प्रमुख दीपकप्रसाद देवकोटासमक्ष शुक्रबार राजीनामा दिएका हुन् ।
प्रदेश लोकसेवा आयोग ऐन, २०७६ को दफा ६(क) बमोजिम कार्तिक ११ गतेदेखि लागू हुने गरी सदस्य पदबाट राजीनामा दिएको ढकालले बताए । वाग्मती प्रदेश सरकारले सहसचिव तहको व्यक्तिलाई प्रदेश लोकसेवा आयोगको अध्यक्ष नियुक्त गरेकाले आफूले राजीनामा दिएको ढकालले बताए ।
प्रदेश सरकारका प्रवक्ता आन्तरिक मामिला तथा कानुन मन्त्री सुरजचन्द्र लामिछानेले प्रदेश लोकसेवा आयोगको अध्यक्ष कसलाई बनाउने भनेर छलफल भएको तर टुंगोमा नपुगेको बताए । मुख्यमन्त्री तथा मन्त्रिपरिषद् कार्यालयका एक वरिष्ठ अधिकृतका अनुसार प्रदेश स्वास्थ्य निर्देशनालय हेटौंडाका पूर्वनिर्देशक महेश्वर श्रेष्ठलाई प्रदेश लोकसेवा आयोग वाग्मतीको अध्यक्ष नियुक्त गरिएको हो ।
