पालुङगढीको संरक्षणमा पालुङ जेसीजको चासो

थाहा नगर / थाहा नगरपालिकामा क्रियाशिल पालुङ जेसीजले थाहा नगरमा रहेका ऐतिहाासिक पुरातात्विक सम्पदा पालुङ गढीकोे संरक्षणका लागि क्रियाशिल भएको छ ।

यसैक्रममा मंगलबार पालुङ जेसीजले थाहा नगरपालिका वडा नं. २ र ३ को सिमानामा रहेको आकासदेबी डाँडामा रहेको ऐतिहाँसिक र पुरातात्विक महत्व बोकेको गढीको संरक्षण, प्रवद्र्धन र बिकासका लागि थाहा नगरपालिकाका उपप्रमुख भरत गोपाली, थाहा २ का वडा अध्यक्ष बम बहादुर सिन्तान, वडा सदस्यहरु, स्थानीय नागरिकहरु बीच अन्तरक्रिया सहित स्थान परिचय कार्यक्रमको आयोजना गरेको छ ।

परापूर्व कालमा पालुङ राज्यको दरबार संरक्षणका लागि उक्त डाँडामा गढी रहेको र नेपाल एकीकरणका क्रममा पृथ्बीनारायण शाहले पालुङ राज्यमाथि आक्रमण गरी उक्त पालुङ गढी र पालुङ दरवारलाई ध्वस्त बनाएको किम्बदन्ती रहेको छ ।

‘हाम्रो सम्पदा परिदृष्य र पुरातन संस्कृतिको प्रवद्र्धन’ भन्ने नाराका साथ थाहा नगरपालिका वडा नं. २ को आकासदेवी डाँडामा रहेको गढीलाई संरक्षण तथा प्रवद्र्धन गर्न उक्त स्थानमै जनप्रतिनिधि सहित स्थानीय सँग अन्तक्रिया तथा स्थान परिचय कार्यक्रम गरिएको पालुङ जेसीज बर्ष २०२३ का कोषाध्यक्ष माधव कार्कीले बताउनुभयो ।

थाहा नगर भित्र रहेको ऐतिहासिक तथा पुरातात्विक स्थानको पहिचान गरि तेसको संरक्षण गर्दै थाहा नगरको पर्यटन प्रवद्र्धनमा सहयोग गर्ने र आफ्नो स्थानमा लुकेर रहेका ऐतिहासिक स्थानको बारेमा प्रचारप्रसार गर्नको लागि कार्यक्रमको आयोजना गरिएको पालुङ जेसीज बर्ष २०२३ का अध्यक्ष संगम कार्कीले बताउनुभयो । कार्यक्रममा पालुङ जेसीजका पूर्व अध्यक्षहरु, बर्ष २०२३ का कार्यसमिति पदाधिकारी लगायत स्थानीयहरुको उपस्थिति रहेको थियो।