गठबन्धनले मकवानपुरमा टुंगो लगायो भागबण्डा
बाइलाइन नेपाल
हेटौंडा । लामो रस्साकस्सी पछि सत्ता गठवन्धनले मकवानपुरका स्थानीय तहको भागवण्डा टुंगो लगाएको छ । जिल्ला तहको नेतृत्वमा सहमति नजुटेपछि मकवानपुरका पालिका भागबण्डाको कुरा पार्टीको प्रदेश कमिटीमा पुगेको थियो ।
आज जुटेको सहमति अनुसार मकवानपुरका १० पालिका मध्ये ५ वटा नेपाली काँग्रेसले प्रमुख, माओवादी केन्द्रले ३ वटा पालिकाको प्रमुख र एकीकृत समाजवादीले २ वटा पालिकाको प्रमुख लिने जनाइएको छ ।
जस अनुसार काँग्रेसले मकवानपुरगढी, मनहरी, राक्सिराङ, कैलाश र वकैयामा प्रमुख पद लिने सहमति भएको छ । यस्तै काँग्रेसले हेटौंडा उपमहानगरपालिका, थाहा नगरपालिका, भीमफेदी, वागमती र इन्द्रसरोवरमा उपप्रमुख पद लिने भएको छ ।
यस्तै नेकपा माओवादी केन्द्रले थाहा नगरपालिका, भीमफेदी र वागमतीमा प्रमुख पद लिने भएको छ । माओवादीले मकवानपुरगढी, मनहरी, राक्सिराङ, कैलाश र वकैयामा उपप्रमुख पाउने सहमति भएको छ ।
यसैगरी एकीकृत समाजवादीले हेटौंडा उपमहानगरपालिका र इन्द्रसरोवर गाउँपालिकामा प्रमुख पद पाउने सहमति भएको छ ।
सहमतिपत्रमा नेपाली काँग्रेसका वागमती प्रदेश सभापति ईन्द्रबहादुर बानियाँ, माओवादी केन्द्रका वागमती प्रदेश अध्यक्ष सरल सहयात्रीको हसताक्षर रहेको छ । यसमा एकीकृत समाजवादीको समर्थन रहेको उल्लेख छ ।
