काँग्रेस वागमतीको सभापतिमा बानियाँ, प्रधान र केसी भिड्ने
हेटौंडा । नेपाली काँग्रेसको बागमती प्रदेशको सभापतिका लागि त्रिपक्षिय भिड्न हुने देखिएको छ । १४ औं महाधिवेशनअन्तर्गत काँग्रेस बागमती प्रदेशको आजबाट हेटौंडामा सुरु हुने अधिवेशनले पहिलोपटक प्रदेशस्तरिय नयाँ समिति चयन गर्दैछ ।
प्रदेश सभापतिमा देउवा पक्षबाट मकवानपुर जिल्ला सभापति तथा बागमती प्रदेश संसदीय दलका नेता इन्द्र बानियाँले उम्मेदवारी घोषणा गरेका छन् ।
यस्तै पूर्वमहामन्त्री कृष्णप्रसाद सिटौला समूहबाट काठमाडौँ जिल्लाका पूर्वसभापति तथा पूर्व रक्षामन्त्री भीमसेन दास प्रधानले उम्मेदवारी घोषणा गरेका छन् । वरिष्ठ नेता रामचन्द्र पौडेल समूहले प्रदेश सभापतिमा जगदीश्वरनरसिंह केसीको नाम अगाडि सारेको छ ।
सिटौला समूहले जुन समूहलाई साथ दिन्छ उसैले जित्ने सम्भावना रहेको जनाइएको छ । बागमती प्रदेश अधिवेशनमा मंसिर १७ गते मनोनयन दर्ता र १८ गते मतदान हुने निर्वाचन कार्यतालिका छ ।
अधिवेशनको उद्घाटन हेटौँडामा रहेको वनविज्ञान अध्ययन संस्थानको कम्पाउण्डमा बिहीबार बिहान ११ बजे काँग्रेसका सभापति एवं प्रधानमन्त्री शेरबहादुर देउवाले गर्ने कार्यक्रम रहेको छ।