आजबाट यस्तो छ हेटौंडा बजार खुल्ने समय
हेटौंडा । मकवानपुरमा फेरि कोरोना संक्रमितको संख्या बढ्न थालेपछि प्रशासनले कढाइ गर्न थालेको छ । जिल्ला प्रशासन कार्यालय मकवानपुरले आजबाट फेरि निषेधाज्ञा एकसातासम्म लम्ब्याएको छ ।
निषेधाज्ञा थपिएसँगै प्रशासनले हेटौंडामा पसल, व्यवसाय सञ्चालन गर्ने समय पनि छोट्याएको छ । आजबाट खाद्यान्न, तरकारीका पसल बिहान १० बजेसम्ममात्र सञ्चालन हुने भएका छन् । यसअघि खाद्यान्न, तरकारी पसल बिहान ११ बजेसम्म सञ्चालन गर्न दिइएको थियो ।
यस्तै अन्य व्यवसाय दिउँसो १२ बजेदेखि ४ बजेसम्म मात्र सञ्चालन गर्न पाउने निर्णय प्रशासनले गरेको छ । यसअघि यसअघि अन्य व्यवसाय बिहान ११ बजेदेखि ६ बजेसम्म सञ्चालन गर्न अनुमति दिइएको थियो ।यसअघि जारी गरेका अन्य निर्देशन भने यथावत रहेको छ ।
कोरोना भाइरसको संक्रमण कायम रहेकाले निषेधाज्ञाको समय थप्ने निर्णय गरिएको प्रमुख जिल्ला अधिकारी भरतमणि पाण्डेले जनाकारी दिए । आज थपिएको निषेधाज्ञा साउन ३२ गते राती १२ बजेसम्म कायम रहने उनले बताए । उनले सबै नागरिकलाई स्वास्थ्य सुरक्षा विधि अपनाउन आग्रह गरेका छन् ।
स्वास्थ्य मापदण्ड अपनाएर सार्वजनिक यातायात गते अनुसार जोरबिजोरको आधारमा मात्र सञ्चालन गर्न पाइने प्रशासनले जनाएको छ । यस्तै आजबाट मास्क नलगाई हिँड्नेलाई प्रहरीले कारबाही गर्ने भएको छ । स्वास्थ्य मापदण्डमा सर्वसाधारणले लापरबाही गर्दा कोरोना बढेको भन्दै जिल्ला प्रहरी कार्यालय मकवानपुरले मास्क नलगाउनेलाई एकसय जरिवाना लिने भएको छ ।