बकैया युवा हत्याः ‘हेपेको’ भन्दै आफ्नै साथीलाई पटकपटक खुकरी प्रहार

हेटौंडा । मकवानपुरमा गत शुक्रबार एक युवकको हत्या भयो। मृतक बकैया गाउँपालिका– ४ नयाँदमारका २० वर्षीय विकास वाइबा हुन्। उनलाई आफ्नै ‘साथी’ले हत्या गरेका थिए। हत्या गर्ने व्यक्ति २० वर्षीय शंकर भन्ने भीमराज भोलन रहेको प्रहरीको भनाइ छ।

उनले आफ्ना साथीमाथि पटक–पटक खुकुरी प्रहार गरी हत्या गरेको प्रहरीले जनाएको छ। शंकरले खुकुरी प्रहार गरी विकासको घाँटीसमेत छिनालिदिएको प्रहरीले जनाएको छ। मकवानपुर प्रहरी कार्यालयका प्रहरी नायब उपरीक्षक (डिएसपी) इन्द्रबहादुर रानाका अनुसार उनलाई प्रहरीले शनिबार ललितपुरबाट पक्राउ गरेको हो। पक्राउ गरेपछि आइतबार कार्यालयले पत्रकार सम्मलेन गरी सार्वजनिक गरेको हो।

के भएको थियो घटना ?

प्रहरीका अनुसार शंकर र विकास मिल्ने साथी हुन्। उनीहरू सँगै बसेर चुरोट, गाँजा लगायतका लागुऔषध पनि सेवन गर्थे। शंकर विकासको घरमा पनि आउजाउ गरिरहन्थे। उनीहरूबीच राम्रो चिनजान थियो। गत शुक्रबार पनि शंकर विकासको घर पुगेका थिए। शंकर केही घण्टा विकासको घरमै थिए। खाजा खाएपछि भने उनीहरू निस्किए।

‘घटना भएको दिन पनि उनीहरू मज्जाले सँगै घरमा बसेका थिए। खाजा पनि खाएका थिए,’ डिएसपी रानाले भने। त्यसपछि उनीहरू घर नजिकैको सिमाद खोलाको बगरस्थित फुटबल चौरमा पुगेका थिए। चौरमा बाख्रा चराउन आएका गोठालाहरू थिए। विकासका साना भाइहरू फुटबल खेल्दै थिए भने उनकी हजुरआमा पनि त्यहीँ थिइन्।

शंकर र विकास त्यहाँ चुरोट खान बसे। त्यतिकैमा उनीहरूबिच विवाद हुन थाल्यो। एक्कासि, शंकरले खुकुरी निकालेर विकासमाथि प्रहार गरे। ‘चुरोट खानेक्रममा विवाद हुनेवित्तिकै शंकरले एक्कासि खुकुरी निकालेर प्रहार गर्छन्,’ डिएसपी रानाले भने, ‘त्यसपछि लखेट्छन्।ु उनले विकासमाथि पटक–पटक खुकुरीले प्रहार गरेका थिए। तर, त्यहाँ भएका प्रत्यक्षदर्शीहरूले शंकरलाई रोक्न सकेनन्।

‘आफ्नै हजुरआमा त्यहीँ थिइन्। उनले टाढाबाट नगर(नगर भन्दै अघि पनि पुगेका थिए। लठ्ठीले हानेको हो कि भन्ने सोचेर अघि बढिन्,’ डिएसपी रानाले भने, ‘नजिक गएपछि हजुरआमाले खुकुरी देखिन्। त्यसपछि उनी आफ्नो ज्यान जोगएर गाउँमा गुहार माग्न आइन्।’ प्रहरीका अनुसार उनले विकासको हत्या गर्ने पूर्वयोजना नै बनाएका थिए। उनले खुकुरी बोकेर गएको हुँदा पनि त्यसको पुष्टि हुने डिएसपी रानाले बताए।

‘आवेगमा आएर गरेको भन्नलाई उनले पटक–पटक प्रहार गरी हत्या गरेका छन्,’ उनले भने, ‘हत्या नै गर्ने पूर्वयोजना बनाइका रहेछन्।ु घटनापछि शंकर जंगल पसे। तत्कालै मकवानपुर कार्यालय र मातहत कार्यालयबाट ३०(४० जनाको टोली खटाइएको थियो। तर, उनी फेला परेनन्।

खोजतलासकै क्रममा प्रहरीले उनी काठमाडौं भागेको भन्ने खबर पायो। त्यसपछि प्रहरीले अरू प्रहरी कार्यालयलाई पनि पत्राचार गरेको थियो। कार्यालयका अनुसार उनको हुलिया र फोटो सबै ठाउँमा पत्राचार गरी पठाइएको थियो। खोजतलास गर्ने क्रममा शनिबार साँझ ५ बजे ललितपुर बागमती गाउँपालिका–२ माल्टाका स्थानीयले उनलाई नियन्त्रणमा लिइएको प्रहरीले जनायो।

शंका लागेपछि उनलाई स्थानीयले नियन्त्रणमा लिएर प्रहरीलाई बुझाएका थिए। उनलाई प्रहरीले शनिबार नै मकवानपुर ल्याएको थियो। प्रारम्भिक अनुसन्धानका अनुसार विकासले शंकरलाई होच्याउने गरेको कारणले हत्या गरेको बयान दिएका छन्।

‘हामीले सोधपुछ गर्दा उनले होच्याउने गरेको र त्यो कुरा पहिलेदेखि मन नपरेको हुँदा हत्या गरेको बताएका छन्,’ डिएसपी रानाले भने। अहिले उनीमाथि प्रहरीले कर्तव्य ज्यान सम्बन्धी कसुरमा थप अनुसन्धान अघि बढाएको छ। सेतोपाटी डट्कमबाट