हेटौंडामा कोरोनाको जोखिम उच्च, एकैदिन २३ जनामा संक्रमण पुष्टि
हेटौंडा । वाग्मती प्रदेशको राजधानी हेटौंडामा एक्कासी कोरोना भाइरसको संक्रमण बढेको छ । एक–दुई जनामा मात्र देखा परेको कोरोना भाइरस आइतबार हेटौंडामा १६ जनासहित मकवानपुरमा २३ जनालाई संक्रमण भएको पुष्टि भएको हेटौंडा उपमहानगरपालिकाका जनस्वास्थ्य निरीक्षक भोला चौलागाईले जानकारी दिए ।
आज देखिएको कोरोना संक्रमितको संख्या मकवानपुरमै हालसम्मको सबैभन्दा बढी हो । हेटौंडा उपमहानगरपालिका क्षेत्रमा पनि आजसम्मकै सबैभन्दा धेरै संक्रमति फेला परेको छ । यससँगै हेटौंडामा कोरोनाको जोखिम उच्च भएको पुष्टि भएको छ ।
कोरोना संक्रमण पुष्टि भएकामा १७ जना पुरुष र अरु ६ जना महिला रहेका छन् । पुरुष मध्येमा चार जना नेपाल प्रहरीमा कार्यरत् रहेको जनाइएको छ । ।
कोरोना संक्रमित देखिएका हेटौंडा–२ का एक जना, हेटौंडा–४ का ४ जना, हेटौंडा–५ का ४ जना, हेटौंडा–६ का एक जना हेटौंडा–११ का २ जना छन् । हेटौंडा ११ थानाभ¥याङमा कार्यरत मजदुरको घर विराटनगर रहेको छ ।
यस्तै, हेटौंडा–१३ का एक जना, हेटौंडा–९ का ३ जना, भीमफेदी गाउँपालिकाका एक जना, मकवानपुरगढीका १ जना, बकैयाका १ जनामा कोरोना संक्रमण पुष्टि भएको चौलागाईले जानकारी दिए । जनस्वास्थ्य अधिकृत चौलागाईंका अनुसार साउन २३ गते ८७ जना र २४ गतेको ४२ जना गरी १२९ जनाको स्वाब संकलन गरिएको थियो। किटजन्य रोग तथा अनुसन्धान तालिम केन्द्रमा रहेको प्रयोगशालामा २३ जनामा कोरोना पुष्टि भएको छ।