हेटौँडाका सरकारी कार्यालयमा सेवाप्रवाह बन्द
मकवानपुरका सरकारी कार्यालयहरू आज आइतबारदेखि बन्द भएका छन् । हेटौँडास्थित जिल्ला प्रशासन कार्यालय, मालपोत, हेटौँडा उपमहानगरपालिकासहित सबै कार्यालयहरूले सेवाप्रवाह बन्द गरेका हुन् ।
कार्यालय बन्द हुने सूचना नपाएर जिल्लाका विकट क्षेत्रबाट सेवा लिन आएका सेवाग्राहीहरू रित्तो हात फर्किनुपरेको छ ।
बिहान करिब साढे १० बजे जिल्ला प्रशासन कार्यालयमा काम लिएर आएका १० जना सेवाग्राहीलाई सुरक्षार्थ खटिएका प्रहरीहरूले फर्काइदिएका छन् ।
सरकारले ९ चैतदेखि अत्यावश्यक सेवाबाहेकका सरकारी तथा निजी कार्यालयहरू बन्द गर्ने घोषणा गरेको थियो ।
‘हामीलाई कार्यालय बन्द भएको थाहै थिएन । बिहान ५ बजेर उठेर घरबाट हिँडेको बन्द पो रहेछ,’ बागमती गाउँपालिकाकी सुनमाया पाख्रिनले भनिन्, ‘खर्च मात्रै भयो । यति टाढाबाट आउनुपर्छ, जानकारी त पहिल्यै दिनुपर्छ नि !’
फापरबारीबाट हेटौँडा आउन करिब २ घण्टा बसमा यात्रा गर्नुपर्छ । नागरिकता, पासपोर्टलगायतका काम लिएर आएका सेवाग्राहीलाई प्रशासनले २२ चैतपछि मात्रै आउन सूचना जारी गरेको छ ।
जिल्ला प्रशासन कार्यालय मकवानपुरले सूचना जारी गर्दै २१ चैतसम्म जिल्लास्थित अत्यावश्यक सेवा बाहेकका कार्यालयहरू बन्द गर्ने निर्णय गरेको छ ।
कोरोना भाइरसको सम्भावित संक्रमणको जोखिम रोकथाम र नियन्त्रणका लागि कार्यालय बन्द गर्नुपरेको प्रशासनद्वारा जारी सूचनामा उल्लेख छ ।